Bikira Mariya udusabire

Bikira Mariya udusabire

Ubutumwa Umubyeyi Bikira Mariya yahaye Byishimo ku itariki 06/06/2013.

Umubyeyi Bikira Mariya yaje ababaye cyane, ari mu rumuli rwinshi cyane ntabona icyo ndugereranya narwo,nuko aranyitegereza aransuhuza ati; 


B.M. : Uraho mwana wanjye ukomeje kwihanganira ibigeragezo byose uhura nabyo. 


Byishimo : Uraho mama. 


B.M.: Mwana wanjye umeze ute? 


Byishimo : Mama meze neza gahoro nawe urabibona, sinkisinzira, sinkiruhuka, ingendo ukomeje kunkoresha hirya no hino mubana bawe ni nyinshi; ariko mama si ninuba, narabyemeye. 


B.M.: Mwana wanjye reka nongere nkutume kubana banjye bo mu Rwanda no mw’isi hose; uti ndababaye, ndababaye, ndababaye, mbabajwe n’ubugome bwinshi mukomeje kunyereka. Ibibi byose mukomeje gukora ndabireba, kandi igihe kirageze kugirango ibyo twababwiye njye n’umwana wanjye bisohore. 


Ubu umwana wanjye agiye kwisukurira u Rwanda, kandi ibyo twakomeje kubabwira ntibireba u Rwanda birareba n’isi yose. Nababwiye ko u Rwanda ari altari y’isi yose, niko bimeze, niyo mpamvu umwana wanjye agiye kurwisukurira hagasigaramo inyangamugayo gusa. Hagasigara abumva ibyo mbabwira njye n’umwana wanjye. 


Bana banjye, ntagihe tutavuze,kandi ibyo twababwiye birahari kandi byaratangiye, uwumva yumve kandi utumva ni akazi ke ntacyo azireguza imbere y’Imana Data. Nababwiye inkangu hirya no hino, mbabwira imitingito hirya no hino ku isi,mbabwira intambara hirya no hino ku isi, ibyo byose mwarabibonye kandi bigiye gukomeza ntabwo bizahagarara, kandi ibihugu bimwe bigiye gusibangana hirya no hino ku isi. 


Ibikomeye biraje kandi bizarokoka bake,kandi byaratangiye, ureba narebe ushishoza ashishoze kuko bigeze kure ntagaruriro. Hari abavuga ngo ariko igihe byavugiwe, ngo bizaba gihe ki? Nyamara bana banjye murugarijwe cyane, uyu munsi wa none ndi kureba kino gihugu cyanyu nkarira adakama, nyabuna bana abanjye abanjye ndabasabye mukomere kuri Rozali n’ishapule y’ububabare nzabarinda. 


Hari abiyita abakungu, mbibabwire ibyo murata si ibyanyu,mubirundarunde ariko mubimenye ko nta na kimwe muzajyana na cyo. Hari aho umwana wanjye yababwiye ngo gatandatu, icyenda,ariko na nubu ntabwo muzi icyo bisobanura, ariko mutangire mubare gatandatu, icyenda icyo bisobanura. 


Bana banjye isi irandwaye, iri kugenda iganisha mu rwobo, twababwiye byinshi,ariko ntabyo mwumvishe, umunyafu twababwiye waratangiye ubu urahari. Erega bana banjye ntacyo navuze kitagomba kuzuzwa, narabinginze murananirana none mureke ibyavuzwe byuzuzwe. 


Bana banjye ishyamba si ryeru,mumenyeko ahasigaye ntawe uzongera kubwira ngo nimbababarire namwe mutambabarira. Amazi yarenze inkombe ntagisigaye, uyu munsi ndababwira bike kuko ibindi umwana wanjye yarabibabwiye. 


Bana banjye murakomeza gutoteza abana banjye mugira ngo simbibona, byose mbibona mbere yuko mubikora; igihe rero kirageze kugirango umwana wanjye abahorere, kuko yihanganye kenshi ariko igihe kirageze cyo kugira ngo ukuri kugaragare,kuko byinshi mugiye kubiryozwa,ubwo kandi si abandi bwira ni abayobozi, mushatse mwunamure icumu kuko amazi yabarenganye inkombe. 


Bana banjye uwumva yumve utarumvishe nawe ni akazi ke. Nongere mbibasubiriremo, ubu u Rwanda rwicayemo njye n’umwana wanjye ni agahugu twihitiyemo. Abicuza rero mwicuze ibyo mwakoze, mumenye rero ko igihe nababwiye kibashiriyeho, kuko nabatumyeho kenshi, mbatumaho intumwa n’abahanuzi, nanjye ubwanjye nariyiziye mwanga kunyumva, umwana wanjye yariyiziye mwanga kumwumva, none rero mureke ibyavuzwe bisohore. 


Mbabwiye ibyo rero uwumva yumve, utumvishe ni akazi ke, ngaho mubane nanjye urukundo rwanjye rubakomeze, ngaho mugire amahoro kandi mugwize andi, mbahaye umugisha ku Izina ry’Imana Data na Mwana na Roho Mutagatifu.

 

Forum Hiwit



25/06/2013
0 Poster un commentaire

A découvrir aussi


Inscrivez-vous au blog

Soyez prévenu par email des prochaines mises à jour

Rejoignez les 12 autres membres