Bikira Mariya udusabire

Bikira Mariya udusabire

UBUTUMWA UMUBYEYI BIKIRA MARIYA YAHAYE BYISHIMO KU WA 01/07/2015

X

Umubyeyi Bikira Mariya yaje ababaye cyane ari mu rumuri rwinshi cyane ntabona icyo ndugerereanya narwo ,nuko aranyitegereza aransuhuza ati:

B.M: Uraho mwana wanjye ukomeje kwihanganira ibigeragezo byose uhura nabyo

Byish: Uraho Mama ?

B.M: Mwana wanjye umeze ute?

Byish: Mama, meze neza gahoro nawe urabibona. Mama, ingendo mukomeje kunkoresha ni nyinshi cyane,sinkiruhuka.

B.M: Mwana wanjye ,komeza wihanganire byinshi nakubwiye kuko ntacyo twavuze kitagomba gusohora.Mwana wanjye aho uri komeza wihangane kandi ibyo tugutumye byose ujye ubivuga nta na kimwe wibagiwe.Mwana wanjye,reka nongere ngutume ku bana banjye bose ,ari abari hano mu gihugu ari abari no hanze hirya no hino ku isi aho batataniye, uti :nimugire amahoro, urukundo rwanjye rubasakaremo.

Bana banjye, nimupfukame musenge cyane,musabira igihugu cyanyu ndetse n’isi yose,kuko cyugarijwe cyane. Bayobozi bategetsi,murugarijwe. Mwakomeje kuntera umugongo,ibyo nababwiye nta na kimwe mwumvise ariko noneho amazi yarenze inkombe.Mukomeje kubabaza abana banjye,bamwe mukomeje kubaroha mu buroko bazira ubusa, abandi bakomeje guhunga igihugu arimwe bahunga bayobozi bakuru,ariko namwe ntimwisize.Ibyo mukomeje gukora, namwe bigiye kubageraho, kandi byaratangiye. Nimubababaze,ariko igihe kirageze cyo kubahorera.

Bana banjye,mbisubiyemo,amazi agiye kurenga inkombe kandi narababwiye kuva kera.Murakomeza kunyunyuza imitsi ya bagenzi banyu ,mugirango simbibona,kandi mba narangije kubibona mbere yuko mubikora.Muravuga ngo mufite amahoro,ntayo.Muravuga ngo murankunda,nyamara ntabwo munkunda.Muravuga ngo murankorera,nyamara ntabwo munkorera uko nshaka.Iyaba munkorera mwakumvishe ibyo mbabwira mukabishyira mu bikorwa.

Bayobozi ,bategetsi bakuru,cyane cyane nimwe mubwirwa.Nabasabye kunamura icumu,bisa n’aho mbabwiye ngo mukomereze aho.Imvura nyinshi y’amahindu igiye kubanyagira,hazarokoka bake.Bana banjye ,murumve iyo mvura mbabwira iyo ariyo.Nababwiye igiti kinini ko cyumye amashami agiye kugishiraho,agishizeho, gisigaye gihagaze cyonyine.

Nkoramutima zanjye bana banjye mwumva ibyo mbabwira kandi mukabishyira mu bikorwa,nimupfukame musenge muvuga Rozali n’ishapure y’ububabare ku wa kabiri no kuwa gatanu,mubisozeshe ishapule y’impuhwe z’Imana.Ndabibasabye bana banjye.Ubu mugeze mu gihe cy’isukurwa,u Rwanda tugiye kurwisukurira rusigaremo abankoreye neza njye n’umwana wanjye.Uwumva yumve, utumva nawe ni akazi ke, ntacyo azireguza imbere y’Imana Data.

Bana banjye,ntimugirengo gusenga hari abo bireba n’abo bitareba, mwese birabareba.Nimupfukame musenge ,musabira kandi urubyiruko kuko ruri kugenda ruganisha mu rwobo.

Nababwiye ko njye n’umwana wanjye,intebe yacu iri hano mu Rwanda, ni agahugu twihitiyemo,nta n’umwe uzi aho twicaye.

Mfite byinshi byo kubabwira,bana banjye, nimunkomereho nanjye mbakomeyeho,abanjye munkunda.Mbisubiyemo,nimuvuge cyane Rozali kuko niyo izabarokora muri ibi bihe bibi mugezemo.

Abanjye mutege amatwi mwumve ibyo mbabwira. Simvuze ngo mugire ibindi munkorera,nimukore ibyo mbasabye gusa mutarebanye ku jisho.Nababwiye ko u Rwanda ari Paradizo y’isi, niko bimeze. Bana banjye,murugarijwe hirya no hino,impande zose z’igihugu ziragoswe. Mumenye kandi ko ntacyo navuze njye n’umwana wanjye kitagomba kuzuzwa,ibyo twababwiye bigiye gusohora, nta kadomo kagabanutseho.

Bana banjye,ibikomeye biraje,birabugarije kandi bizarokoka bake. Kandi mubimenye,ntacyo mutazi. Nabahaye igihe gihagije cyo kwisubiraho,ariko mwaranze murananira. None ubu rero bana banjye,ufite amaso yo kureba, narebe aho ibihe bigeze. Reka mbacire umugani: ‘’Umuvumvu yagitse umuzinga usarurwa n’abandi’’ , kandi umwana wanze kumva ntiyanze no kubona. Intango iruzuye, igiye gusandara, kandi izasandarana byinshi. Bana banjye aho mwicaye, nimusenge ,nimusenge,nimusenge.Urugogwe rugiye kubikubita hejuru.

U Rwanda ni agahugu kanjye n’umwana wanjye,niyo mpamvu nakomeje kubabwira byinshi kugira ngo ndebe niba hari uwarokoka koko.Ndabona nta nyota mumfitiye,ariko ntacyo ,harimo abankunda,niyo baba babiri,nafatanya nabo.Nimupfukame mumfashe,abanjye bankunda,musabira igihugu cyanyu ndetse n’isi yose,musaba amahoro.

Ndabona abenshi mukomeje kunangira imitima yanyu ,mwaratwawe n’iby’isi, ntimumenye ko ibyo mutunze aritwe twabibahaye. Ibyo byinshi mukangisha, mugiye kubibura mubireba. Murarundarunda byinshi,ariko ntabyo muzatunga.

Bana banjye,nongere mbasubiriremo,mugiye guhura n’umunyafu ukomeye. Si umunyafu ahubwo ni ikibando.Murumve ibyo mbabwiye.Nababwiye ko intambara nyinshi ziri mu mitima yanyu,niko bimeze. Bana banjye,ubu shitani yinjiye hose, ubu mu gihugu cyose irugarije, igiye guhitana benshi. Bana banjye,ndabona imitima yanyu ikakaye cyane,irumye cyane. Kugeza ubu ikeneye amazi. Bana banjye,uyu munsi simbabwira byinshi cyane,kuko ibyinshi mwarangije kubyumva,utarumvishe ntacyo azireguza.

Ngaho mubane nanjye,urukundo rwanjye rubasesekareho, ngaho mugire amahoro kandi mugwize andi, urwo rukundo mbahaye kandi mbasezeranyije, ntimuzarutezukeho, iteka nzabafasha.Mbahaye umugisha wanjye wa kibyeyi.


13/07/2015
0 Poster un commentaire

Ubutumwa Umubyeyi Bikira Mariya yahaye Byishimo ku tariki 13/05/2015

 

X

Umubyeyi Bikira Mariya yaje ababaye cyane ari mu urumuri rwinshi cyane ,aranyitegereza aransuhuza arabwira ati: Mwana wanjye reka nongere nkutume ku bana banjye.

Bana banjye uyu munsi wa none nongeye kubambwira murugarijwe. Afrika we , Afrika we, urugarijwe, nababwiye ko intambara izaturuka mu duhugu duto ntimwabyumva, none mwatangiye kubibona.

Rwanda, Rwanda, Rwanda we ufite ibibazo, Kigali we, Kigali we Kigali we, urugarijwe, ntacyo ntavuze kitagomba gusohora, kuko Kigali uri isibaniro kandi ko nta buye rizasigara ku irindi.

Barumuna na barumuna, bagiye gusubiranamo kandi byaratangiye, kandi narabibabwiye. Navuze ko utu duhugu duto ariho intambara izatangirira ikomeye, byaratangiye, biri gusatira mwebwe bana banjye kuko niho bizasorezwa. Navuze ko u Rwanda narugize aritali y’isi yose, kuko ariho nicaye njye n’umwana , ureba n’ arebe uko maze kurugira, ndabibabwiye bana banjye , ndabibabwiye bana banjye.

Mwakubiswe umunyafu, mwarabibonye, n’ubundi rero mugiye kongera gukubitwa akanyafu gakomeye, kuko mutabyumvishe, abankunda njye n’umwana wanjye ni mupfukame musenge, muvuge rozali n’ishapule y’ububabare kuwa kabiri no kuwa gatanu, mu sozeshe ishapule y’impuhwe, kandi bana banjye musabire nabatabasha kuyivuga.

Niyo mpamvu mpora mbwira umwana wanjye ngo nanjye I Kibeho gupfukama, apfukamire benshi, kuko I Kibeho atari umurenge atari akagari nta n’ubwo ari n’umuryango, ahubwo ni abo mpasanga niyo baba ari babiri cyangwa batatu, iyo bapfukamye bari kumwe n’umwana wanjye mba ndi kumwe nabo kuko baba basabira igihugu ndetse basabira n’isi yose, niyo mpamvu uyu munsi nongeye kubabwira ngo musenge, musenge, musenge musabira igihugu cyanyu kuko murugarijwe cyane.

U Rwanda nararukunze n’abanyarwanda, muhore muri maso bana banjye, kuko ishyamba si ryeru. Bana banjye mwarahawe ariko nti mubizi, uwambaye ikirezi ntamenya ko kera koko. Bana banjye b’abanyarwanda narababwiye ntacyo mutazi, mumenye ko amazi yarenze inkombe, ibyabaye hano muri kino gihugu cyanyu bigiye kwikuba kabiri kubera kutumva kwanyu kw’abanyarwnda.

Bana banjye reka nongere mbacire umugani, “umwana wanze kumvira se na nyina yumviye ijeri”,<< Mama ayo magambo namwe murayazi >>, ibyo uvuga ntabwo ari wowe ubyihaye ninjye ubiguhaye ngo ubacire umugani, kuko nabahaye byinshi ariko ntimushobora gushimira, kuko iyo mumenya gushimira ntabwo biba bigeze iki gihe.

Muririrwa muravuga ngo itsinzi, ntayo mufite kuko mutashoboye kwakira umugisha mwahawe, iyo mubimenya muba mwaramenye ko njye n’umwana wanjye twicaye hano. U Rwanda tururimo rwagati kugeza na n’ubu ntawe uzi aho twicaye, intebe yacu niho iri, mbisubiremo muririrwa muririmba amahoro,amahoro, ntayo kuko mutashoboye kwakira ijambo ry’umwana wanjye.

Hari indamutso mwahawe ivuga ngo: “Yezu akuzwe”, “iteka ryose”, ntabwo mukurikiza ngo iteka ryose ahubwo muba muryaryana ,iyo ndamutsa ni nkuko muhana amahoro ya Kristu, muri mu ingoro y’umwana wanjye. Bana banjye ni mujya guhana ayo mahoro mujye muyahana koko, naba ari yo koko muzajya mwumva ibinya bibagezemo, muzaba muyatanze koko, kuko umwana wanjye azaba abarimo; kandi igihe cyose umwana wanjye ari kuri aritali nanjye mba mpari, kandi burya bana banjye, umwana wanjye aba yarangije kubaha imigisha.

Mubyumve neza, iyo winjiye mu ngoro y’umwana wanjye uba warangije gukira ku mubiri no kuri roho, burya rero ntawe utaha ubusa, mwese ikiganza cy’umwana wanjye kiba cyabagezeho, ndabibabwiye rero bana banjye muhore mwiyoroheje ku mitima yanyu, kuko iyo muje mudusanga ntawe dusubiza inyuma.

Mupfukame rero musenge, kuko murugarijwe, musabire n’ibindi bihugu by’isi yose, kuko aka gahugu ari aritari y’isi yose kandi niho ubutumwa buri gusohokera; cyane cyane musabire Afrika kuko irimo uduhugu nisukuriye kandi ibyo mbabwira byaratangiye ntabwo bigomba gusubira inyuma.

Nababwiye ko intambara ikomeye iri mu mitima yanyu, niko bimeze,mubanze mwirebe, umuntu arebe mugenzi we, kandi mugire n’ubushishozi, mumenye ko igihe murimo gikomeye cyane. Muri ku isi muracumbitse, umwana wanjye yabaharuriye ikibuga ngo mukidagaduriremo ariko ntimuzi igihe muzakiviraho.

Bana banjye u Rwanda nararukunze n’abanyarwanda niyo mpamvu uyu munsi wa none nkomeje kubatumaho umwana wanjye w’intamenyekana bose basuzugura naramubahaye ngo abagezeho ijambo ryange n’umwana wanjye. Mwana wanjye nawe nubwo usigaye utindana ubutumwa nguhaye, umunyafu wakubiswe, ubutaha uzarengaho. Ndabikubwiye, ubyumve,ubyumve,ubyumwe, ni wowe mwana wanjye ntumye ku banyarwanda, sinzongere no kubigusubiriramo, nijya nguhamagara ujye uhita unyitaba uti: karame mubyeyi

Bana nanjye , mupfukame musenge,musengere cyane cyane igihugu cyanyu kuko mukomerewe cyane, kandi mbari iruhande sindabarekura. Bana banjye rero uyu munsi wa none, abanjye nkunda mupfukame cyane musenge muvuge rozali, ishapule y’ububabare n’ishapule y’impuhwe z’imana, nandi madini yandi muvuge amasengesho menshi musabire igihugu cyanyu kuko kirugarijwe.

Bana banjye uyu munsi wa none mbabwiye bike ibindi nzabibabwira ubutaha, simbasezeyeho ndacyari kumwe namwe, ngaho mubane nanjye urukundo rwanjye rubakomeze, ngaho mugire amahoro kandi mugwize andi. Bana banjye nkuko uyu munsi wa none muje munsanga, uyu munsi wa none mbahaye umugisha wanjye wa kibyeyi.


13/07/2015
0 Poster un commentaire

UBUTUMWA NYAGASANI YEZU YAHAYE BYISHIMO KU TARIKI YA 19/03/2015

 

X

Nyagasani Yezu yaje ababaye cyane ari murumuri rwinshi ntabona icyo ndugereranya narwo nuko aranyitegereza aransuhuza ati :

Yezu : Uraho mwana wanjye ukomeje kwihanganira ibitotezo byose uhura nabyo.

Byishimo : Uraho Papa.

Yezu : mwana wanjye ihanganire byinshi ubona, kandi uzi kuko ntacyo utabwiwe, wihanganire imibabaro iri mu mubiri wawe, kuko iyo mibabaro, ni abantu benshi bari kuri ino si ndetse no mu gihugu cyanyu bari guhongererwa, kandi wibuke ko nakubwiye ko igihe cyose mu gisibo, ari ugusenga cyane kandi ubabarira benshi, kandi ubasabira.

Umenye ko nakubwiye ko uwo usabira muri kino gisibo, ari umurwayi, ari ufite ikibazo arakira. Mwana wanjye rero ongera unsuhurize abana banjye bose ntawe urobanuye, ari abari mu igihugu ari n’abari hirya no hino ku isi yose uti nimugire amahoro, nimugire amahoro, nimugire amahoro, urukundo rwanjye rubasakaremo.

Bana banjye ndababaye, ndababaye, ndababaye cyane, mbabajwe n’abantu hirya no hino bakomeje kwicana, bakomeje kubabaza abandi, mugira ngo simbibona, nyamara bana banjye natanze igihe kirekire cyo kwisubiraho,ariko mwanze kunyumva, umunsi ni umwe ntabwo mubabwiye ariko mumenye ko umunsi ari umwe byose bikarangira; ibihano mwateguriwe ntaho byagannye, kubera kumbabaza kwanyu, ntabwo bwira u Rwanda gusa, ndabwira isi yose, ariko u Rwanda birarenze.

Ubu mukomeje kumbabaza cyane, inkovu zanjye zikomeje kugashuka, mukomeje kuntoneke. Mwana wanjye uko ureba meze uku, aya maraso akomeje kuva ni ibyaha byinshi by’abantu bakomeje kuntera. Mwana wanjye babwirire uti : aho muri, abasenga nimusenge, mumenye ko ibyo nababwiye njye n’umubyeyi wanjye, ntagishobora guhinduka kubera kutisubiraho kwanyu, cyane cyane nimusengere igihugu cyanyu n’abayobozi banyu kuko bakomeje kumbabaza cyane. Ndababwira ntibumva, umubyeyi wanjye yarababwiye ntibamwumva none igihe cyo guhanwa cyabo cyaratangiye kandi cyarageze, simpaniraho, ariko benshi bari guhanwa bari kuzira ibyo bakoze.

Bana banjye ubu umubyeyi wanjye ari kureba uko meze, yareba kino gihugu akarira adakama, najye ubwanjye nareba kano gahugu nicayemo njye n’umubyeyi wanjye nkarushaho kubabara cyane. Rero ngo mufite amahoro ra, ntayo, mbisubiremo nkuko nabibabwiye, kano gahugu nicayemo njye n’umubyeyi wanjye ngiye kukisukurira, nababwiye ko ari aritari y’isi yose, niko biri kuko niho intebe yanjye iri, uwumva yumve, utumva nawe ni akazi ke.

Erega bana banjye bya bihe nababwiye bikomeye mubirimo kandi mwabigezemo, igihe cyo guhana no guhemba abangiriye neza kirageze, kuko ntabwo nzakomeza kuvuga. Nababwiye byinshi mwanga kumva, mbatumaho intumwa n’abahanuzi mubita abasazi none ndiyiziye, ndiyiziye, ndiyiziye , nje guhana no guhemba, nje kurengera abana banjye benshi bari kurengana.

Rero ngo mufite imbaraga ra, ngiye kubereka ufite imbaraga uwo ari we, mugiye gukubitwa umunyafu ukomeye cyane, mbere kari akanyafu ariko ni ikibando.

Bategetsi, bayobozi ba kino gihugu muranze murananiye, igihe rero kirageze ngo mubazwe ibyo mukomeje gukora, mukomeje kurenganya bagenzi banyu mugira ngo simbibona ariko mugiye kubibazwa, mubimenye u Rwanda nararuhawe, narugabiwe n’umwami wanyu I Nyanza, uwishyira hejuru wese agiye guhananurwa, ndabibabwiye uyu munsi, ubu ndi mumibabaro.

Umubyeyi wanjye afite agahinda kenshi areba uko meze, inkota nyinshi zikomeje kumusogota kubera mwebwe, uyu munsi ndabibabwiye ibihe mugezemo ntibyoroshye birakomeye cyane, nababwiye igiti kinini ko nta amashami gifite, bamwe mwakomeje kwibaza icyo giti kinini cyumye kitakigira amashami icyo ari cyo,mukomeze mushishoze murebe icyo giti icyo ari cyo, ariko abareba kure barakibona.

Bana banjye amazi yarenze inkombe, ubwatsi bwo haruguru no hepfo y’inzira bugiye guhura, kubera kutumva kwanyu. Mwana wanjye nawe wigira ubwoba bwo gutanga ubutumwa nguhaye,jya ubutanga uko mbuguhaye kugirango abana banjye bumva ibyo mbabwira njye n’umubyeyi wanjye bashobore kumenya aho ibihe bigeze.

Erega bana banjye umwana wanze kumva, ntiyanze no kubona, urugogwe rugiye kubikubita hejuru, kandi ibi mbabwira mumenye ko ntakizasigara, uwakoze neza agiye guhembwa uwakoze nabi nawe agiye guhanwa.

Uyu munsi mbabwiye ibyo uwumva yumve utumva nawe yirorerere, kuko azabibazwa. Mwana wanjye mbwirira abana banjye bose uti mbifurije kuzashyikirana nanjye, mu Rwanda rushya mu bihe bishya nagabiwe n’umwami wanyu I Nyanza. Mbahaye umugisha ku izina ry’Imana Data na Mwana na Roho Mutagatifu.

Amen


13/07/2015
0 Poster un commentaire

Ubutumwa umubyeyi Bikira Mariya yahaye Byishimo ku tariki ya 25/02/2015.



Umubyeyi Bikira Mariya yaje yishimye kandi ababaye, nuko aranyitegereza aransuhuza ati mwana wanjye reka nkutume kubana banjye bari mu Rwanda ndetse no kw’isi yose. 

Umubyeyi yakomeje aririmba ati “ Naje mbasanga bana banjye, naje mbakunda kandi mbakumbuye bana banjye, muhumure muhumure, muhumure naratsinze nimika urukundo bana banjye, bana banjye, bana banjye ,ndabakunda, ndabakunda,ndabakunda,muhumure, muhumure, muhumure, naratsinze nimika urukundo bana banjye. Kibeho,Kibeho,kibeho; kibeho ntabwo ari umuryango bana banjye, ahubwo ni abo nje nsanga bana banjye, muhumure,muhumure,muhumure naratsinze nimika urukundo bana banjye.” 

Bana banjye uyu munsi ndabibabwiye, nje mbasanga, kandi mwibuke ko ibi bihe murimo ari ibya nyuma, si nabwo bwa mbere na bibabwira, murugarijwe ,murugarijwe, murugarijwe, nababwiye ko ibihe bikomeye mubirimo; mubirimo, kandi byaratangiye. 

Ubu butumwa busohore,kandi n’uwo mwana wanjye ubwandika namuhaye ingabire y’ubushishozi,guca bugufi ,kwiyoroshya,kwihangana no kwihanganirana . Mwana wanjye ongera umumbwire ngo umwana wanjye ntatana n’umusaraba, ahora yishimye, ibyisi abibonamo ubusa, nawe rero mwana wanjye ujye ubibonamo ubusa, ni ibyange, ninjye ubibaha mujye mumenya kubikoresha. 

Mbwirira abana banjye bari hanze, batatanye, uti muhumure, muhumure, igihe cyanyu kirageze ngo muhure n’abandi bana banjye mwasize, imbona nkubone. Nje mbasanga bana banjye ,nje mbakumbuye bana banjye,ngiye kubahuza imbona nkubone, igihe kirageze cyo kugira ngo muhure umwe n’undi. 

U Rwanda narabasuyeinshuro nyinshi, na n’ubu ndacyabasura, ese mwatanze iki? Bana banjye nababwiye ko aka gahugu ari akanjye, nkicayemo njye n’umwana wanjye nta numwe uzi aho twicaye, mubimenye, mubimenye iki gihugu cy’u Rwanda twaragihawe, twaragihawe; twagihawe n’umwami wanyu I Nyanza kandi nawe ndi umubyeyi we. 

Nababwiye ko byabihe bikomeye mubirimo, mubirimo kandi byaratangiye, ushishoza ashishoze, nababwiye intambara nyinshi zikomeye kandi ziri mu mitima yanyu, uwireba yirebe, ureba arebe ko igihe gikomeye mu kirimo kandi cyatangiye.Ureba arebe aho ibihe bigeze, 

Mwana wanjye nawe ndagusabye ngenda upfukame ku butaka butagatifu,upfukamire abana banjye benshi, batatanye bari hirya no hino kw’isi yose, bapfukamire bapfukamire, kuko igihe kigeze cyo kugirango mwese mbahurize mu gikumba kimwe. 

Bana banjye, ndabakunda, ndabakunda,ndabakunda, u Rwanda umwana wanjye yararuhawe kandi arugabirwa n’umwami wanyu,ni urwange rero turwicayemo, bana banjye rero muhore mwiteguye kuko mutazi umunsi n’isaha , na kano kanya mbabwiye mushobora kumva mutunguwe, muhore muri maso rero. 

Mwana wanjye nawe ndakwinginze ,kuko isaha n’isaha ushobora kumva ngo haguruka ,ninkubwira ngo haguruka,haguruka ugende, itike ntabwo ari wowe uyitanga, ninjye uyiguha, n’ubuzima bwawe ninjye 

uburinze, ako kaguru kawe rero, ntabwo ari wowe wagahenjuye,ninjye ,kugira ngo wumve ko ibyo nkubwira bigomba kuzuzwa. 

Mwana wanjye nimba nkuhaye ubutumwa, jya wihutira kubutanga, ntabwo ari ubwawe, kuko buri gukiza abantu benshi. Ako kanyafu wakubiswe ni ikimenyetso gikomeye cy’uko ibyo ngutuma byinshi utabikora, ubahiriza rero ubutumwa nguhaye kuko ugiye kugenda mu mambo, ndabikubwiye mwana wanjye, ndabikubwiye,byubahirize, ntabwo wabuze itike yaho nagutuma hose. 

Mwana wanjye ntuzarenganye umwana wanjye navuze ngo nakwandikire, ntabwo yishe isaha,ntabwo yishe igihe, ahubwo ni wowe wishe igihe, ntumurenganye rero ngo niwe wanze gukora gahunda yanjye, ahubwo ni wowe, niwowe mwana natumye ku Rwanda, kandi nguha ubutumwa bwinshi bw’u Rwanda ngo busohoke, kugirango batazagira ngo ntacyo bamenye. 

Ndabibabwiye, ndabibabwiye,ndabibabwiye ko cya gihe kigeze ngo mbe ndi kumwe namwe, u Rwanda ni paradizo y’amahanga yose, agahugu kanjye nicayemo njye n’umwana wanjye, nongere mbasubiriremo buri muntu wese agiye kuza asanga u Rwanda. 

Mwana wanjye nkutumye, ku bantu bose ari abanyarwanda ari abanyamahanga, ku muntu wese ugutera inkunga; ntabwo ari bo, ahubwo ninjye ubatera imbaraga kugirango bagufashe kugera aho nkutumye. Uyu munsi wa none ikimenyetso warakibonye ni imva nakwerekaga ko byose bishoboka. 

Nsezerera rero ku bana banjye,ngo ngaho mubane nanjye urukundo rwanjye rubakomeze. Mbahaye umugisha wanjye wa kibyeyi ku Izina ry’Imana Data na Mwana na Roho Mutagatifu, Amen; ni ahubutaha. 


15/04/2015
0 Poster un commentaire

Ubutumwa Umubyeyi Bikira Mariya yahaye Byishimo ku tariki ya 28/11/2014

Umubyeyi Bikira Mariya yaje ababaye atishimye,ari mu rumuri rwinshi cyane , ntabona icyo ndugereranya narwo, nuko aranyitegereza aransuhuza ati:

Bikira Mariya: Uraho mwana wanjye ukomeje kwihanganira ibigeregezo byose uhura nabyo

Byishimo : Uraho Mama.

Bikira Mariya : Mwana wanjye umeze ute?

Byishimo : Mama meze neza gahoro nawe urabibona, ingendo mukomeje kunkoresha ni nyinshi cyane maze kunanirwa, ariko si ninuba kuko imbaraga nkoresha si izanjye nimwe muzimpa.

Bikira Mariya : Mwana wanjye, kuri uyu munsi wanjye ukomeye cyane, ongera unsuhurize abana banjye bose, baje kwizihiza iyi sabukuru kuri iyi tariki ya 28, uti nimugire amahoro, ni mugire amahoro, urukundo rwanjye rubasakaremo.

Bana banjye iyi tariki nti muzayibagirwe , kuko ni itariki ikomeye cyane nigaragarijeho hano I Kibeho. Abana banjye baje mu butumire kuri ino tariki, ndetse nababyifuzaga bakabura amikoro, mwese mbahaye umugisha wanjye wa kibyeyi.

Bana banjye nkunda, uyu munsi wa none mbahaye amahoro, urukundo rwanjye ndarubahaye, ariko muramenye ntimuzibagirwe urukundo mbahaye kandi mbasezeranyije, ntimuzarutezukeho, iteka nzabafasha, ariko ndabwira abana banjye bankunda kandi bankomeyeho.

Bana banjye, uyu munsi wa none nongere mbabwire, ubu ndi kumwe n’umwana wanjye ntabwo ndi njyenyine, mwe mwashoboye kuza musabire n’abandi batashoboye kuhagera ntimwisabire mwenyine,kuko isengesho atari iryumwe gusa, uwashoboye kuhagera wese namuhaye imbaraga, munkomereho rero nanjye mbakomeyeho.

Bana banjye umwana wanjye arababaye arababaye cyane, ababajwe cyane na bamwe benshi, banze kwakira ubutumwa ngo ntibusinye, ntibamenye ko sinya ari iyi Imana. Ubu rero umwana wanjye agiye kubasinyira maze mubibone. Bana banjye ufite amaso yo kureba n’arebe maze ashishize arebe aho ibihe bigeze, ubu mugeze mubihe bya nyuma, mugeze aho umwana arira nyina ntiyumve.

Mwabwiwe byinshi ubu muri gusubirirwamo, uwumva yarumvishe utarumvishe nawe ni akazi ke. Bana banjye uyu munsi wa none abo turi kumwe ni mwishime munezerwe kuko muri kumwe na nyina w’umukiza.

Uyu munsi wa none kandi, simbabwira byinshi, mumenye ko mugeze mw’ icura burindi. Ubu benshi muri kugenda muganisha mu rwobo, mwatumweho kenshi, mutumwaho intumwa n’abahanuzi, umwana wanjye arantuma, nawe ubwe ariyizira mwanga kutumva mureke rero ibyavuzwe bisohore.

Mbisubiyemo aka gahugu tukicayemo njye n’umwana wanjye kandi ntawe uzi aho twicaye,u Rwanda tururimo rwagati. Bana banjye twaravuze mwanga kutumva ,nyamara rero bana, abanjye mwumva ibyo

mbabwira kandi mukabishyira mu bikorwa, mupfukame musenge muvuge Rozali n’ishapule y’ububabare kuwa kabiri no kuwa gatanu mubisozeshe ishapule y’impuhwe z’Imana mubikore kandi nkuko mbibasabye iteka nzabafasha.

Bana banjye ngaho mubane nanjye urukundo rwanjye rubakomeze ngaho mugire amahoro kandi mugwize andi ,uyu munsi wa none mbahaye umugisha wanjye wa kibyeyi.

 

Sources: Forum Hiwit


23/02/2015
0 Poster un commentaire


Recherche

Vous recherchez ? :