Bikira Mariya udusabire

Bikira Mariya udusabire

mars 2014


Ubutumwa Umubyeyi Bikira Mariya yahaye Byishimo ku I tariki ya 1/03/2014

Umubyeyi Bikira Mariya yaje ababaye, atishimye cyane nuko aranyitegereza aransuhiza ati : 

Bikira Mariya : Uraho mwana wanjye ukomeje kwihanganira ibigeragezo byose uhura nabyo. 

Byishimo : Uraho mama, 

Bikira Mariya : Mwana wanjye umeze ute ? 

Byishimo : Mama meze neza gahoro nawe urabibona imibabaro ikomeje kuba myinshi mu mubiri wanjye. 

Bikira Mariya : Komeza rero mwana wanjye wihangane, ukomeze usabire benshi nagushinze, niwo murimo naguhaye, kandi mwana wanjye ndishimye , nshimishijwe n’amasengesho naguhaye ukaba warabashije kuyarangiza, n’urugendo naguhaye ukaba warabashije kururangiza. 

Byishimo : Urakoze mama. 

Bikira Mariya : Ariko kandi mwana wanjye ujye wubahiriza ibyo nkubwiye ubivuge ,nta nakimwe wibagiwe, kuko kenshi mbona ubitindana,kandi iyo utabivuze hari benshi uba wishe. 

Mwana wanjye ongera unsuhurize abana banjye bose, ari abari hano mu gihugu n’abari hanze, uti ni mugire amahoro, ni mugire amahoro, ni mugire amahoro, urukundo rwanjye rubasakaremo. 

Bana banjye, nabatumyeho kenshi , mbatumaho intumwa n’abahanuzi, nanjye ubwanjye nariyiziye n’umwana wanjye, ariko mwanze kutwumva, ntagaruriro rero, twakomeje kwihangana tugira ngo turebe ko hari uwahinduka ariko ntacyahindutse, iyo mbabwiye ngo ni mwunamure icumu bisa nkaho mbabwiye ngo nimukomereze aho. 

Nababwiye ko intambara ibugarije, intambara mvuga ikomeye iri mu mitima yanyu. Muririrwa muratoteza bagenzi banyu ,muragambanirana, muricana mugirango simbibona kandi ibyo mukora byose mba narangije kubibona. 

Aragowe, aragowe uri kwica mugenzi we, kuko uri kwicisha inkota nawe agiye kuyicishwa. Bana banjye ba banyarwanda naziye mwebwe, naziye mwebwe, naziye mwebwe, kuko nabonaga hari icyo mukeneye, ubu bana banjye ,ubu shitani yabinjiyemo, yabinjiyemo mu mpande zose z’igihugu ubu irimo irakorera ku mugaragaro, no mubayobozi bakuru irimo, niho yashinze imizi. 

Bayobozi, bategetsi, sibwo bwa mbere nababwira, mukomeje kurya abo muyobora mubagambanira , byinshi rero mugiye kubiryozwa; dore mvugiye ku mugaragaro, uwumva yumve, mushatse, mugabanye inda zanyu, musangire na bagenzi banyu. 

Mwana wanjye nawe kandi ndagushimira urugendo wakoze werekeza I Kibeho,wubahiriza inshingano naguhaye,uzanshimirire nabo mwari kumwe mufatanya isengesho. Erega mwana wanjye babwirire uti Kibeho ntabwo ari umuryango, Kibeho ntabwo ari umurenge Kibeho ni abo nza mpasanga. 

Bana banjye bumva ibyo mvuga kandi bakabishyira mu bikorwa, ni muvuge Rozali buri munsi ishapule y’ububabare ku wa Kabiri no kuwa Gatanu musabira abatabashije kubikora kandi musabira igihugu cyanyu kuko mbona cyugarijwe cyane. 

Bana banjye ni musabe cyane,musabire igihugu cyanyu kuko kirimo amahwa y’inzitane kandi benshi agiye kubahanda. Uku kwezi murimo kurakomeye cyane, mugeze mu kwezi kubi cyane mubimenye, kuzarokoka bake. Benshi muratunguwe, muratunguwe kubera kutumva kwanyu. 

Bana banjye b’abanyarwanda nongere mbasubiriremo ,umwana wanze kumvira se na nyina yumviye ijeri, kandi uwanze kumva ntiyanze no kubona. 

Byishimo : Mama ko ukomeje kunyereka byinshi kandi bikomeye, mwakomeje kunyereka intango yuzuye igiye gusandara none mukaba mukomeje kunyereka abantu benshi bapfa none se mama ko ukomeje kunkura umutima, aho ryamye nkicara mfite ubwoba. 

Bikira Mariya : Mwana wanjye wigira ubwoba ibi nkomeje kukwereka niko bigomba kumera kuko kugeza ubu ntagaruriro. Bana banjye urugogwe rugiye kubikubita hejuru muri gushaka amafaranga, muri kurundarunda byinshi ariko si ibyanyu ntabyo muzatunga mubimenye, kandi ntagihe ntabibabwiye. Hari bamwe bavuga ngo igihe navugiye ngo mbese bizaba ryari, ibimenyetso birahari, nababwiye imyuzure, imiyaga, inkangu hirya no hino,mbabwira umuntu ukomeye uzicwa ibyo byose mwarangije kubibona, ntacyo rero mutabonye ubu hasigaye akantu gato kamwe kandi nako kari hafi, mubyumve, mubyumve , mubyumve, ntacyo ntavuze kitagomba gusohora. 

Bana banjye mbasubiriremo, uwanjye wumva ibyo mvuga kandi akabishyira mu bikorwa, uwo igihe cyose muri iruhande ntacyo azaba nzamurinda. Bana banjye mu nkomereho nanjye mbakomeyeho. 

Bana banjye ari abari hanze ari nabari hano mu igihugu nababwiye ko, njyiye kubabumbira hamwe, mugikumba kimwe ,niko bimeze. 

Bana banjye mwumve ibyo mbabwira aho muri hose, ndabasaba Rozali, ishapule y’ububabare kuwa Kabiri no ku wa Gatanu, kuko niyo igiye kubarokora. Bana banjye uyu munsi nongere mbasubiriremo, mbaha byinshi ,bamwe ngo biriya ni ibiki, nyamara bamwe mugiye kubazwa ibyo mwanze kumva. Ndababaye, ndababaye cyane, mbabajwe na kino gihugu cyanyu n’abanyarwanda, kuko benshi bagiye gutsebwaho. 

Bana banjye uyu munsi wa none simbabwira byinshi kuko byinshi narabibabwiye ,uwumva yarumvishe utarumvishe nawe ni akazi ke ntacyo azireguza imbere y’Imana Data. 

Bana banjye ngaho mubane nanjye urukundo rwanjye rubakomeze, mbahaye umugisha ku Izina ry’Imana Data na Mwana na Roho Mutagatifu.Amen

 

FORUM.HIWIT.COM 


26/06/2014
0 Poster un commentaire

Ubutumwa Nyagasani Yezu yahaye Byishimo ku tariki 1/03/2014

Nyagasani Yezu yaje ababaye cyane ,ari mu rumuri rwinshi cyane ntabona icyo ndugereranya narwo nuko aranyitegereza aransuhuza ati;

Yezu : Uraho Byishimo mwana wanjye. 

Byishimo :Uraho papa. 

Yezu: Mwana wanjye umeze ute? 

Byishimo: Papa meze neza neza gahoro nawe urabibona imibabaro ni myinshi mu mubiri wanjye. 

Yezu: Mwana wanjye emera ubababare, ubabarire benshi kuri ino isi kuko nicyo wahamagariwe,kuko kubabara kwawe hari benshi kurimo gukiza. 

Byishimo : Ikindi kandi Papa ingendo mukomeje kunkoresha ni nyinshi,ntabwo nkiruhuka maze kunanirwa. 

Yezu : Byishimo mwana wanjye wivuga ngo umaze kunanirwa kuko imbaraga ukoresha ntabwo ari izawe, nitwe tuziguha. 

Byishimo : Papa n’ubundi ndabizi ariko intege nke za muntu ziranga mubyeyi. 

Yezu: Mwana wanjye ongera unsuhuriza abana banjye bose, ari abo muri kumwe ari nabari hanze uti ni mugire amahoro, ni mugire amahoro, ni mugire amahoro. 

Bana banjye ndababaye, ndababaye, ndababaye cyane, mbabajwe n’abana banjye bakomeje gutotezwa hirya no hino bamwe bakomeje kurundwa mu nzu z’imbohe ,abandi barimo kwicwa, abandi barimo guhunga igihugu, arimwe bahunga mwe bayobozi bakuru. Mukomeje kubikora mugirango si ndeba,kandi mubikora narangije kubibona mbere, sindakomeza rero kurebera,igihe kirageze kugirango mbahorere. 

Bana banjye u Rwanda nararukunze njye n’umubyeyi wanjye, ariko muranze murananiye, imvura y’amahindu igiye kubanyagira, murumve namwe iyo mvura y’amahindu mvuga iyo ariyo, aya mezi mugezemo ntabwo yoroshye birakomeye, umunyarwanda azifuza kurahura umuriro muri km 3, ntabwo zikiri eshatu ahubwo zirarenga kuko mwarambabaje cyane. 

Nakomeje kubinginga muranga murananira,mugiye guhura n’umunyafu ukomeye cyane, bana banjye, ntacyo ntavuze,naravuze, umubyeyi wanjye aravuga ,mbatumaho intumwa n’abahanuzi ,mwanga kubumva none urugogwe rugiye kubikubita hejuru. 

Kigali we,Kigali we, Kigali we,uragowe, nkuko nsazwe mbibabwira, ntabuye rizasigara rigeretse ku rindi kubera kunangira imitima kwanyu, ureba arebe kandi ashishoze,ibimenyetso byinshi, bihagije, mwarabibonye, mwabwiwe umuyaga, mubwirwa inkangu,mubwirwa umwuzure ndetse mubwirwa umuntu ukomeye uzapfa muri kino gihugu cyanyu cy’u Rwanda, ibyo byose mwarabibonye, hasigaye rero akantu gato ngo byose birangire. 

Mwana wanjye kandi ,ubwo butumwa butange nta bwoba ufite, ntacyo ugabanyije kandi ntacyo wongereyeho,kuko ndi kumwe nawe. 

Bana banjye uyu munsi nje ndi umwami w’isi n’ijuru, nsa nkaho ndi kubabwira irya mbere na nyuma, uwumva yarumvishe utarumvishe nawe ni akazi ke, ubu nje kwishungurira inyangamugayo, abakoze neza babe impande yanjye, abakoze nabi nabo bahanwe, bana banjye ntacyo nta koze mbinginga kugirango ndebe ko hari uwarokoka, ariko muranze murananiye. 

Nziye igihe, nziye igihe, nziye igihe bana banjye, nje guhana no guhemba, ibi mbabwira kandi bizarokoka bake. Ndababwira n’umubyeyi wanjye akababwira mukavuga ngo ese biriya ni ibiki? Igihe kirageze rero ngo mubazwe ibyo mwanze kumva. 

Bana banjye, uyu munsi simbabwira byinshi, kuko ibyinshi narabibabwiye njye n’umubyeyi wanjye ntacyo mutazi, uyu munsi kandi mwana wanjye unshimirire umwana wanjye ukomeje kugutera inkunga mu ingendo zose uhora ukora. Mubwirire uti; aragushimiye kandi ukomereze aho , mubwirire uti mwana wanjye naraguhaye nawe ntiwanyimye iyo uhaye umwana wanjye ninjye uba uhaye ,aho uri umenye ko mpakwicaje kandi ukomereze aho umenye ko ugiye kuzabihemberwa. 

Nsezarerera ku bana banjye bose uti, mbifurije kuzashyikirana nanjye ,mu bihe bishya, mu Rwanda rushya nagabiwe n’umwami wanyu I Nyanza. 

Mbahaye umugisha ku Izina ry’Imana Data na Mwana na Roho Mutagatifu. Amen 

 

Forum hiwit


20/03/2014
0 Poster un commentaire